RENUNGAN 70 taun nu dibaca ku Ajip Rosidi téh leuwih ti satengah jam. Eusina gunem catur jeung dirina pribadi, tiasa dios di dieu. Ngan sabada Kang Ajip ngucapkeun salam keur mungkas biantara, anjeunna ngaregog. Rék turun ti panggung kadéngé sora nu tatabeuhan mani séah. Sora tarompét nérétét, kurunyung nu ngagotong jampana, dituturkeun ku nu ngibing, nu tatabeuhan, jeung nu mawa umbul.
Rombongan nu tatababeuhan ngajajar di panggung. Kang Ajip masih kénéh kerung, malah ngaharéwos ka nu ngagotong jampana, pokna, “naon éta téh?”
“Tumpeng, Kang!” walon nu ngagotong jampana bari angger ngéngklak. Kakara geus kitu mah Kang Ajip “tenang”, singhoréng acara pamungkas téh motong tumpeng.
Ajip Rosidi motong tumpeng ulang taun ka-70.
Bérés nu tatabeuhan, Kang Ajip motong éta tumpeng, dibaturan ku Kang Ganjar Kurnia jeung Chaédar Alwasilah. Tumpeng meunang motong téh terus dipasrahkeun ka Dr. (HC) Rosihan Anwar jeung H. Soekanto S.A. Geus kitu acara ditutup ku do’a.
Nu boga gagasan “ngareureuwas” Kang Ajip téh saenyana Kang Ganjar. Dina rapat panitia méméhna, Kang Ganjar nyebutkeun yén rék nyieun surprise ka Kang Ajip. Da apan dina susunan acara mah teu kasabit-sabit rék aya nu ngagotong tumpeng bari ditabeuhan. (Dadan Sutisna)
Dodong Djiwapradja - 09-02-2008 pukul 16.09
Yip hampura dewek dina waktuna ulang taun ilaing nu ka 70 dewek jeung pamajikan teu bisa datang , lantaran lanceuk dewek (Ceu Siti Djulaeha) di Garut tilar dunya.
Du’a ti dewek mah muga-muga ilaing sing panjang punjung, hirup sejahtera salawasna kalawan barokah ti Alloh.
Yip, 25 September 2008 dewek 80 taun, tapi moal dirayakeun, da tara, tapi mun rek mere kado mah moal ditampik
(imah dewek di riung bandung keneh).
Tah, dewek oge boga situs di internet ayeuna mah ( moal eleh ku ilaing :p ), beunang nyieun barudak: http://dodongdjiwapradja.com. (”under construction” keneh)
Wassalam
KD (Kang Dodong)
jusair - 23-03-2008 pukul 17.43
kitu meureunnya ai kolot ka nu ngorana mah babasaana teh!
Duh, eta aki Dodong bahasana. isim abdi teh bade diajar deui babasaan sunda anu tiis kana ceuli!
eta meuni duwak dewek,make ilaing deui ! wah teuing ah!!
jusair